ဝမ်းမြောက်ခြင်း

လူသားတိုင်း ဘဝတွင် ဝမ်းမြောက်ခြင်းလိုချင်ကြသည်မှာ မထူးဆန်းပေ။ ကျွန်ုပ်တို့သည်လည်း ဝမ်းမြောက်ဖို့ရန်အတွက် ဖန်ဆင်းခံရခြင်းပင်ဖြစ်သည်။     သို့သော်လည်း နေရာတိုင်းတွင် ဝမ်းမြောက်မှု ရှားပါးလျက် ရှိနေသေးသည်။ ပျော်ရွှင်ဖို့ရန်အတွက် ငွေများ၊ အင်အားများ ကျွန်ုပ်တို့ မည်မျှ အသုံးပြုခဲ့ရသလဲဆိုတာ တွေးကြည့်ဖူးပါသလား။ ကလေးငယ်များသည် အတွင်းစိတ်သာမက အပြင်ပိုင်းမှာပင်လျှင် သဘာဝကျကျ ပျော်ရွှင်တတ်ကြပါလျက် ကြီးပြင်းလာကြသည့်အခါ ယင်းရိုးသား ဖြူစင်သော ဝမ်း‌မြောက်မှုများ အဘယ်ကြောင့် ဆုံးရှုံးကြရပါသနည်း။  သင့်ဘဝ၌ အကောင်းဆုံး ဝမ်းမြောက်မှုကို မည်သည့်အရာက ပေးစွမ်းပါသနည်း။ သင့်ဝမ်းမြောက်မှုကို မည်သည့်အရာက လုယူပါသနည်း။ ကျွန်ုပ်တို့အားလုံးသည် စစ်မှန်သော ၀မ်းမြောက်မှုကို အမှန်တကယ် ရရှိချင်ကြသည့်အတွက် ထိုမေးခွန်းများကို စဥ်းစားသင့်ပါသည်။  ဝမ်းမြောက်မှုကင်းမဲ့ရခြင်း၏ ယေဘုယျအကြောင်းရင်းမှာ ကျိုးပြတ်သွားသော ပတ်သက်မှု၊ ကွာရှင်းမှု၊ အကြမ်းဖက်မှု၊ လျစ်လျူရှုခံရမှုနှင့် အထီးကျန်ခြင်းတို့ကြောင့် ဖြစ်နိုင်ပါသည်။ ထို့အပြင် မိဘများကသူတို့အား မချစ်ဘူးဟု ခံစားနေရသော သားသမီးများနှင့် သားသမီးများက သူတို့အားဂရုမစိုက်ဟု ခံစားနေရသော မိဘများတို့သည်လည်း ဝမ်းမြောက်ခြင်းပျောက်ဆုံးနေတတ်ကြသည်။ အရက်သေစာသောက်ခြင်း၊ မူးယစ်ဆေးဝါးသုံးစွဲခြင်း၊ အလုပ်အလွန်အကျွံလုပ်ခြင်းနှင့် ဖျော်ဖြေရေးများကို ဝမ်းမြောက်မှုအတွက် အစားထိုးလာကြသော်လည်း စစ်မှန်သော ပျော်ရွှင်ဝမ်းမြောက်ခြင်းအား အစားထိုးရန်အတွက်မူ မဖြစ်နိုင်ပေ။